Sjálfstæðismenn í Garðinum hafa misst meirihlutann. Engar líkur á að Ásmundur Friðriksson verði bæjarstjóri þar áfram.

BB Fréttir, skrefi á undan.
Meirihluti Sjálfstæðismanna í Garðinum er fallinn.
Engar líkur eru taldar á að Ásmundur Friðriksson bæjarstjóri haldi starfi sínu.
Kolfinna S. Magnúsdóttir, D-lista, mun að sögn hafa gengið til liðs við minnihlutann. Áfall fyrir Sjálfstæðisflokkinn, sem alltaf hefur verið mjög sterkur í Garðinum.
Eftir síðustu kosningar var staðan þessi í Garðinum, sem er um 1500 manna sveitarfélag:
D-listinn fékk fjóra fulltrúa. L-listinn fékk einn, en L-listinn er klofningur frá D-lista! N-listinn fékk tvo fulltrúa, en að honum standa kratar, VG og þeir tveir Framsóknarmenn sem vitað er um í bænum!
Þess má svo geta að skólanefndin í bænum hefur óskað eftir lausn frá störfum, eftir mjög svarta skýrslu sérfræðinga um skólamálin í bænum.
Líf og fjör í Garðinum!
Pólitíkin þar hefur verið hatröm um langt árabil.

Niðurrökkun, ný þjóðaríþrótt

Þjóðaríþróttir landans eru margbreytilegar!
Lengi var það glíman. Sokkabuxurnar strengdar. Stigið! Sigtryggur vann!
Svo kom handboltinn. Strákarnir okkar að kljást við stórþjóðirnar.
Svo komu fótboltastelpurnar okkar, berlæraðar í blöðrubólguveðri.

Nú er það niðurrökkunin á stjórnmálafólki og öðru fólki sem velst til viðkvæmra stjórnunarstarfa í þjóðfélaginu.
 

Í ríkisstjórn, á Alþingi, í Seðlabankanum, í stjórnum lífeyrissjóðanna, í bankakerfinu, í dómskerfinu, í LÍÚ forustunni, hjá flokkunum, í sveitarstjórnum, í ráðuneytum og víðar og víðar.

Af því að 1. mai er í dag nefni ég sérstaklega forustu ASÍ. Mörgu fólki er unun að því að sparka fast í forustumenn þeirra samtaka og baktala hressilega í leiðinni.
"Þeir gera ekkert fyrir okkur þessir andskotar!"
"Þeir hugsa bara um eigin hag þessir andskotar!"

Ávallt röklausar upphrópanir reiðs fólks, sem sjaldnast er í takti við raunveruleikann.
Hvað á ASÍ að gera fyrir fólkið umfram það sem gert hefur verið?

Beina byssukjöftum að atvinnurekendum og knýja fram 100% launahækkanir öllum til óbóta og til hruns atvinnulífsins og þjóðlífsins?

Linnulaus, endalaus og ábyrgðarlaus kjaftháttur, ásamt spörkum og höggum neðan beltis, er hin nýja þjóðaríþrótt á Íslandi og í henni er rífandi gangur!

Ekki er ég barnanna bestur þar.

Vek þó athygli á þessu.

Sendi öllum launþegum í landinu bestu kveðjur í tilefni af baráttudegi verkalýðsins.
Þótt 1. mai sem slíkur sé að hverfa í blámóðu minninganna.
Fram eftir síðustu öld var 1. mai einn stærsti dagur ársins.

Þingmannsefni staðfestir að Páll Vilhjálmsson sé leigupenni

 Nú hefur fengist staðfesting á því sem mig hefur lengi grunað.
Páll Vilhjálmsson, sem titlar sig blaðamann, einn 40 stjórnarmanna (!) í Heimssýn, samtökum sem berjast gegn ESB aðild, er leigupenni.

Heimssýn fékk 9 milljónir af svokölluðum ESB peningum, í gegn um ríkið, til að halda málstað sínum til streitu og kynningar.

Páll Vilhjálmsson sér um heimasíðu samtakanna og skrifar þar pistla og þiggur laun fyrir það. Væntanlega eru svo Heimssýnarmenn bráðánægðir með skrif Páls á Moggablogginu líka.

Staðfestingin er komin frá félaga Páls í stjórn Heimssýnar, þingframbjóðanda sem heitir Jón Ragnar Ríkharðsson, svohljóðandi orðrétt:

"Páll er meðal annars leigupenni hjá mér og mínum félögum í Heimssýn, við borgum honum laun fyrir að sjá um bloggið okkar og skrifa stundum í það, ágætis blogg hjá honum Páli."

PS. Í stjórn Heimssýnar eru 6 konur og 34 karlar! Ekki þykir það nú merkilegt hlutfall á árinu 2012!

Nú totta margir ESB spenana!

"Til að standa straum af kostnaði við síðuna er leitað eftir styrkjum og auglýsingum." Nema hvað? Þá er nú notalegt að fá ríflegan styrk frá ESB! Það munar alveg um 7 ESB millur!

Um Evrópuvaktina (orðrétt af síðu hennar):
Á Evrópuvaktinni er lögð áhersla á málefni tengd Evrópusambandinu, þróun evrópskra stjórnmála og efnahagsmála auk umræðna hér á landi um þessi mál og tengsl Íslands og Evrópusambandsins. Þá verður fylgst með framvindu ...alþjóðlegra stjórnmála og efnahagsmála í þessu ljósi. Efni síðunnar byggist á fréttum, fréttaskýringum, pistlum og ritstjórnardálkum.

Umsjónarmenn efnis eru Björn Bjarnason, fyrrverandi ráðherra, og Styrmir Gunnarsson, fyrrverandi ritstjóri. Tæknileg umsýsla vefsins er í höndum Vefmiðlunar ehf.

Til að standa straum af kostnaði við síðuna er leitað eftir styrkjum og auglýsingum. Rekstrarleg umsýsla er í höndum félagsins Evrópuvaktin er umsjónarmaður þess Friðbjörn Orri Ketilsson.

Ritstjórn
Björn Bjarnason - [e-mail]
Styrmir Gunnarsson - [e-mail]

Netfang ritstjórnar - [e-mail]

Kvótafrumvörpum Steingríms verður örugglega breytt

Dettur ekki í hug að trúa því að kvótafrumvörpin fari óbreytt í gegn um þingið.

Dettur ekki í hug að trúa því að útgerðarmenn og verkendur í Grindavík muni þurfa að greiða ríkinu 2000 milljónir árlega miðað við núverandi forsendur.

Ýmsir landsbyggðarþingmenn munu sjá til þess að verulega verði dregið úr þessari gjaldtöku. Þingmenn sem þurfa á atkvæðum fólks í sjávarbyggðum að halda.

Ekki leigðir, heldur keyptir

Útgerðin þjóðnýtt!
Segja keyptir pennar.

Ekki klúðra tækifærinu til að gera Bessastaði að stolti þjóðarinnar eftir allar hörmungarnar á liðnum misserum!

Forsetapæling að marggefnu tilefni.
Sjálfstæðismenn vita manna best að þjóðin mun aldrei kjósa forseta úr þeirra röðum. Þeir hafa reynt að stilla upp sínum mönnum, án árangurs, og virðast nú aðeins sjá einhverja glóru í einum mest hataða einstaklingi innan flokks síns í gegn um tíðina.

Ólafi Ragnari Grímssyni.

Viltu brosa, hlæja eða gráta? Viltu kannski Norður Kóreu klút?

Það er fullkomlega kýrskýrt að allir frambjóðendur stefna að því að fella þann sem situr. Andstæðingar Ólafs Ragnars verða að sannmælast um einn öflugan frambjóðanda og þá mun hinn ómissandi með mikilmennskubrjálæðið skítfalla þann 30. júní í sumar!

Nýtt Ísland, takk fyrir!

Ráðist á saklausa meðan sekir ganga lausir?

Stórmerkilegt hvað Davíð Oddsson ætlar að sleppa billega frá hruninu. Hann lék góða karlinn í Landsdómi í gær.

Vissi svo margt og varaði svo oft við!

Lítum nánar á söguna.

Davíð beitti sér af hörku fyrir einkavæðingu bankanna 2002. Var þá forsætisráðherra. Gengdi því embætti til 15. september 2004. Varð þá ráðherra utanríkismála, til 27. september 2005. Þá tók starf Seðlabankastjóra við og úr því var hann hrakinn með látum 2009, eftir að allt var farið til andskotans.

Svo lendir Geir Haarde bara fyrir Landsdómi!

Rétt eins ekkert athugavert hafi gerst á vakt Davíðs, sem þó lagði grunninn að viðbjóðnum og stóð sem Seðlabankastjóri miklu nær bönkunum en nokkur annar maður!

Réttlætið í þessu landi!
Hvernig er það eiginlega?

Leyndarmálið dýra og litli hlýðni strákurinn með pennann

Hér kemur algjör skáldskapur sem enginn er beðinn að trúa:

Ring, ring, ring!

"Bjarni minn þú þarft að skreppa og undirrita nokkur skjöl fyrir okkur."
"Nú, hvernig skjöl eru það?"
"Best að þú vitir sem minnst um það vinur."
"Nú, eru þetta þá einhver leyniskjöl?"
"Nei, nei, bara svona venjuleg viðskiptaskjöl."
"Jæja, er um háar fjárhæðir að tefla?"
"Tja, sumum finnst 10 milljarðar mikið, öðrum ekki."
"Mér finnst það nú nokkuð mikið, en hvað á að gera við alla þessa peninga?"
"Það er best að þú vitir sem minnst um það vinur."
"Þetta hljómar nú dálítið einkennilega, satt að segja."
"Nei, nei, bara ósköp venjuleg viðskipti, drífðu þig bara vinur."
"Allt í lagi, ég skrifa þá undir, en þú segir mér kannski meira um málið seinna."
"Geri það vinur, eða kannski þeir í bankanum."
"Allt í lagi, geri þetta, bless og hafðu það gott."
"Sömuleiðis vinur og gangi þér vel við undirskriftirnar."

Lagt á.

Bjarni og stofuhitinn!

Ef Bjarni Benediktsson vissi ekkert um hvert 10 þúsund milljónirnar frægu áttu að fara, þá er hann með viðskiptavit og greindarvísitölu á við stofuhita í snjóhúsi á Suðurpólnum!
Þetta mál verður grátbroslegra með hverjum deginum sem líður!