Forsetinn með pólitíska kjarnorkusprengju

"Jóhanna Sigurðardóttir, forsætisráðherra, sagði við Sjónvarpið nú síðdegis, að ákvörðun forseta Íslands valdi vonbrigðum en nú verði hafist handa við að undirbúa þjóðaratkvæðagreiðslu um Icesave-lögin."

Forsetinn gengur gegn vilja 70% þingmanna. Ég hygg að það sé einsdæmi í hinum vestræna heimi, í löndum sem kenna sig við lýðræði. 

Ákvörðun Ólafs Ragnars í dag hlýtur að vekja gífurlega athygli um allan heim. Nú er Icesave deilan ekki lengur deila þriggja þjóða.

Ólafur Ragnar hefur varpað kjarnorkusprengju inn í alþjóðasamfélagið.

Nú má segja að allt bankakerfið um víðan völl sé komið í stóraukinn fókus og dómstólar munu hafa nóg að gera í framhaldinu. Fjárhagsleg kerfi margra landa munu lenda á borðum dómaranna.

Hver á að borga hverjum hvað, hvernig og hvenær?

Annað. Ég legg til að í þjóðaratkvæðagreiðslunni verði líka þessi spurning:

Á þjóðin okkar að borga hinar gífurlegu afskriftir fyrirtækja í fjölþættum rekstri, sem leitt hafa til tuga milljarða innskots í bankakerfið frá ríkissjóði, sjóði fólksins í landinu?

Hvað segja skattgreiðendur um það?

 

Atkvæðagreiðslan verði sem fyrst

Athugasemdir

[Doddi (IP-tala skráð) 20.2.2011 kl. 17:34]

Á bak við þessa undirskriftarsöfnun var félegt lið. Einn vildi drepa Samfylkingarmenn menn með skordýraeitri og hengja aðra. Annar vildi nota rafbyssur og háþrýstidælur á mótmælendur. Þriðji talaði um valdarán þegar óþægilegt mál kom upp fyrir Sjálfstæðisflokkinn fyrir kosningar.

Þetta lið hefur náð völdum í landinu með aðstoð forsetans.

Menn af sama sauðahúsi höfðu stjórnlagþingskosninguna af þjóðinni með dyggri aðstoð hæstaréttar.

[Björn Birgisson, 20.2.2011 kl. 17:38]

Þú ert stóryrtur í dag, Sveinn minn! Verð að viðurkenna að mér líkaði innlit þitt ágætlega!

[Hrafn Arnarson (IP-tala skráð) 20.2.2011 kl. 17:42]

Rökstuðningur Ólafs Ragnar er sérkennilegur. Hvert er úrslitaatriðið að hans mati? Jú, það er að Alþingi hafði ekki endurnnýjað umboð. Það er sama þingið sem samþykkti samning 2 og 3. Hann virðist líta svo á að Alþingi hafi skilyrt umboð vegna þess að samningur 2 var felldur. Hvar má finna þessu lagastoð? Það er ekki undirskriftasöfnun sem skiptir máli, ekki aukinn meirihluti á þingi, ekki ákvörðun Alþingis að efna ekki til þjóðaratkvæðagreiðslu. Forsetinn hefur vald til að vísa málum til þjóðarinnar. En matið er hans og það er algerlega huglægt. Það virðist vera hægt að spinna upp hvaða rökum sem hugsast getur. Það er ljóst að svona getur stjórnskipunin ekki verið lengur.

[Doddi (IP-tala skráð) 20.2.2011 kl. 17:46]

Rök forsetans voru undarleg, vissulega. Sérstaklega þetta með að ekki hafi verið kosið aftur til þings. 

Undirskrifasöfnunin viðist vega þungt hjá forsetanum. Ég hallast að því að það sé ekki svo mikið að safna 40.000 undirskriftum á netinu. Þetta er allt annað en áður þegar menn þurftu að skrifa undir á blað.

[Doddi (IP-tala skráð) 20.2.2011 kl. 17:47]

Björn: ég geri ráð fyrir að þú vitir hverja ég á við. Þetta er fasistaliðið yst á hægrivængnum.

[Björn Birgisson, 20.2.2011 kl. 17:48]

Forsetinn er bara á egóflippi. Það er málið.

[Björn Birgisson, 20.2.2011 kl. 17:51]

Sveinn, ég skildi innleggið ágætlega. Það veist þú vel! Ég kannast ágætlega við þessa kauða.

[b (IP-tala skráð) 20.2.2011 kl. 18:01]

ég sé ekki hvernig við getum mögulega sloppið betur frá þessu. Það er og hefur aldrei verið um það deilt að fyrirfram bar okkur sennilega ekki skylda til að borga.

Það sem eftir stendur er svo það að um leið og við ábyrgðumst innistæður að fullu á Íslandi þá erum við nánast örugglega búin að skuldbinda okkur til að ábyrgjast í topp allar aðrar innistæður og að neyðarlögin gildi jafnt um íslenska bankareikninga á Íslandi sem og annarsstaðar sem fellur undir okkur (ekki 100% örugglega af því að ekki hefur reynt á þetta ákvæði í jafn stóru máli áður).

Við getum semsagt lent í því að borga upphæð sem gæti verið allt að 5-7x hærri upphæð en um var samið. Þetta ákvæði var sett inn í stofnsáttmála ESB til að varna bæði gegn rasisma og misrétti, og þetta er ein grundvallar regla Evrópusambandsins. Að mörgu leyti er ég sammála þessu ákvæði en það var ríkisstjórn D og Framsóknar sem ákvað að setja ekki nándar nærri (og í raun akkúrat í hina áttina farið) jafn strangar reglur og við gátum þegar frjálst fjármagnsflæði var leyft.

Spurningin er: þegar að því kemur sem eru um 70% líkur á að gerist, að við verðum dæmd (og biðjum til guðs að dómurinn gangi út frá Icesave samningunum og ekki þrengstu túlkun jafnréttisákvæðis ESB), mun þjóðin snúast gegn Davíð, Margréti Frímanns, Halldóri Ásgríms og Óla, eða munum við halda áfram að gráta yfir núverandi stjórn sem situr uppi með skítinn.

Vil svo taka fram að ég er eindreginn hægri maður en með mikil vonbrigði með allt það sem frá D hefur komið þangað til Bjarni Ben tók sig saman í andlitinu.

[Doddi (IP-tala skráð) 20.2.2011 kl. 18:25]

b: Þú kemur inn á kjarna málsins sem Íslendingar hafa ekki viljað horfa á. Þetta voru ekki venjuleg gjaldþrot einkafyrirtækja eins og sumir segja.

Ríkið fór þarna inn og hirti innistæðurnar og færið í nýja banka. En erlendum innistæðum var ekki bjargað á sama hátt og þeim innlendu. 

Málið mun aldrei vinnast fyrir dómi.