Ómarktæk skoðanakönnun?

Mogginn birti í gær nýja skoðanakönnun sem mér fannst um margt dálítið skrýtin. En skítt með það. Íhaldið getur ornað sér við að kannski fái það 24 þingmenn næst þegar kosið verður, ekki veitir nú af góðum fréttum hjá Valhallarliðum þessa dagana.

Þessi könnun gat hins vegar ekki mælt það sem gæti orðið merkilegast við næstu kosningar, hvenær sem þær verða. Það er slagkraftur nýrra afla á stjórnmálasviðinu. Miðlun ehf. gerði könnunina fyrir Moggann og þar á bæ hefðu menn auðveldlega getað skotið Besta flokknum, eða sambærilegum nýjum öflum, inn sem valmöguleika og ég er sannfærður um að það hefur verið nefnt, en skotið í kaf frá Hádegismóum með langskoti frá hægri.

Málið er nefnilega svona vaxið. Bjóði Besti flokkurinn, nú eða annað sambærilegt afl, fram á landsvísu með sama árangri og náðist í Reykjavík, þá má reikna því framboði á bilinu 23-26 þingmenn.

Þá yrði nú lítið eftir til skiptanna fyrir fjórflokkinn!

Er ekki rétt að hafa þetta í huga í næstu könnun?