Takk Húsafell fyrir allt nema eitt

Húsafellsskógur er tvímælalaust ein af náttúruperlum Íslands. Við hjónin dvöldum þar í okkar Combi Camp vagni í fimm sólarhringa í blíðunni sem verið hefur að undanförnu.

Þétt var setinn bekkurinn og gestir í tjöldum, tjaldvögnum, fellihýsum, hjólhýsum og húsbílum vafalítið taldir í þúsundum frekar en hundruðum. Að ógleymdum öllum gestunum í sumarhúsunum.

Staðarhöldurum vil ég þakka kærlega fyrir allt -  nema eitt.

Þetta eina skiptir miklu máli. Það snýst um hreinlæti og mengunarhættu.

Aðstaða til að tæma ferðasalernin, sem svo margir eru komnir með, er til háborinnar skammar í Húsafellsskógi og lítið mál ætti að vera fyrir staðarhaldara að bæta snarlega úr, minnka með því mengunarhættu á svæðinu og gleðja þannig gesti sína enn betur.