Stjórnmálaáll

Er nokkuð líkt með álum og stjórnmálum? Állinn er veiddur þannig að hann er lokkaður inn í aflanga gildru með einhverju æti og svo ratar hann ekki, eða kemst ekki út aftur.

Stjórnmálamenn taka sér ýmislegt fyrir hendur og gengur svo afleitlega að bakka frá eða breyta fyrri ákvörðunum.

Fjölmargir Íslendingar, bæði innan þings og utan, vilja breyta kvótakerfinu. Hvernig gengur það? Ekki baun í bala. Stjórnmálaállinn ratar ekki út.

Fjölmargir Íslendingar, bæði innan þings og utan, vilja breyta aðkomu ríkisins að landbúnaðinum. Hvernig gengur það? Eiginlega ekkert. Stjórnmálaállinn ratar ekki út.

Fjölmargir Íslendingar, bæði innan þings og utan, vilja afleggja hið nána samband ríkisins og kirkjunnar. Hvernig gengur það? Ekkert. Stjórnmálaállinn ratar ekki út.

Fjölmargir Íslendingar, bæði innan þings og utan, vilja láta afnema ýmsa skatta sem áttu að vera tímabundnir, en fá síðan að lifa. Hvernig gengur það? Lítið. Stjórnmálaállinn ratar ekki út.

Fjölmargir Íslendingar, bæði innan þings og utan, vilja að hætt verði við ESB umsóknina og að hún verði dregin til baka. Hvaða líkur skyldu vera á að þannig fari? Mjög litlar.

Stjórnmálaállinn ratar ekki út úr því máli frekar en öðrum stórum málum.

Alltaf skal hann festast í eigin gildrum.

(Endurbirt, aðeins breytt)

Athugasemdir

[Doddi (IP-tala skráð) 27.8.2010 kl. 18:17]

Hér hefur mikið gengið á undanfarið, vegna efnahagshrunsins, þannig að ekki hefur enn unnist tími til að fara í mörg brýn mál. Það stendur þó til bóta, eins og vel hefur komið fram í máli þeirra Steingríms og Jóhönnu undanfarið.

Fljótlega verður kosið til stjórnlagaþings og má búast við að þar verði tekin ákvörðun um samband ríkis og kirkju. Væntanlega verður aðskilnaður þar ofaná.

Einnig má búast við afgerandi ákvörðunum um kvótakerfið á næsta þingi.

Það er því mikilvægt að fólk sýni þolinmæði, meðan stjórnvöld eru að ná tökum á stöðunni.

[Björn Birgisson, 27.8.2010 kl. 18:23]

Sveinn hinn Ungi, þolinmæði er ein þeirra mörgu dyggða sem hafa alveg sniðgengið mig, alveg að mér forspurðum!