Er Steingrímur kominn í póker?

„Trúin á fjárhagslegan styrk íslenskra fyrirtækja er að aukast á ný, þannig að ríkið snýr aftur á alþjóðlega lánsfjármarkaði á næstunni," segir Steingrímur J. Sigfússon, fjármálaráðherra, í viðtalið við þýska dagblaðið Frankfurter Allgemeine Zeitung.

Er þetta ekki bara óskhyggja og áróðursbragð hjá Steingrími? Verður hann ekki að vera svolítið kokhraustur í útlöndum til að villa þarlendum sýn? Heitir þetta ekki að blöffa í póker?

Vera kann að ástandið hér hafi eitthvað skánað, en ég get ekki betur séð en að við eigum fjári langt til lands og róum þar gegn þungum straumi, sem ber okkur af leið þegar minnst varir.

Þar á ég aðallega við stjórnmálaástandið hér innanlands, sem hlýtur að fæla flesta hugsandi fjárfesta frá landinu. Oft hafa stjórnmálin okkar verið skrautleg, en aldrei sem nú.

Hér er hver höndin upp á móti annarri og útlendingarnir, sem sitja á öllu gullinu, vita það betur en við sjálf. Glöggt er gests augað.

En Steingrímur verður auðvitað að reyna að bera sig mannalega fyrir hönd þjóðarinnar í útlöndum.

Skárra væri það nú.

 

Ísland aftur á alþjóðamarkaði

Athugasemdir

[Hólímólí (IP-tala skráð) 9.10.2010 kl. 19:01]

Ég segi nú bara eins og hann Jónatan ... Til hvers að vera rænngi ef maður þarf svo alltaf að vera að gera eitthvað?

[Björn Birgisson, 9.10.2010 kl. 19:20]

Hólímólí, nú er ég ekki alveg að skilja þig, minn kæri. Kannast þó við Jónatan.

[Guðmundur Ásgeirsson, 9.10.2010 kl. 19:53]

Manni sýnist helst að þetta sé samskonar ímyndarherferð og Geir H. Haarde réðst í fyrir hönd íslensku bankanna sumarið 2008. Með afleiðingum sem flestum eru kunnar. Fyrst trúin á styrk íslenskra fyrirtækja er svona mikil, afhverju þarf þá að vera að reyna að breiða þann boðskap út til hinna trúuðu? Og svo er Steingrímur líka ennþá á fullu að reyna að fá Breta og Hollendinga til að taka við peningum íslenskra skattgreiðenda. Ég er vonandi ekki einn um að þykja það vera öfugsnúið hvernig Steingrímur virðist hafa breyst í Geir H. Haarde, getur verið að þetta sé umskiptingur?

[Björn Birgisson, 9.10.2010 kl. 20:34]

Guðmundur, Steingrímur er að reyna að taka til eftir Geir Haarde og fleira fólk. Til þess þarf ekki umskiptinga, heldur ofurmenni. Steingrímur er hvorugt.

[Stefán Júlíusson (IP-tala skráð) 9.10.2010 kl. 20:55]

Ég var að lesa viðtalið á www.faz.net.

Þetta er ekki alveg svona dramatískt.  Hann segir að þetta sé allt í undirbúningi.  Það er enginn tími gefinn og því getur undirbúningurin alveg eins tekið 1, 10 eða 100 ár;)

En þetta viðtal er algerlega innihaldslaust ef maður les það á þýsku;)

[Stefán Júlíusson (IP-tala skráð) 9.10.2010 kl. 20:56]

www.faz.net er eins og mbl.is hjá Frankfurter Allgemeine Zeitung.

[Guðmundur Ásgeirsson, 11.10.2010 kl. 16:07]

Það er rétt að Steingrímur er ekki ofurmenni. Og hann er ekki heldur að taka til hérna heima á meðan hann er í ímyndarherferð í útlöndum.