Spái því að kosningaþátttakan til Stjórnlagaþings verði aðeins 30%-40%

Nú er hálfur mánuður í einstæðar kosningar hér á landi. Kosningar til Stjórnlagaþings. Áhugi bogaranna á að komast á þetta þing reyndist ótrúlega mikill. 523 vilja fá að verma sætin 25, kannski 31, sem eru í boði.

Ekki verður betur séð en að allur undirbúningur fyrir kosningarnar af hálfu stjórnvalda sé til fyrirmyndar. Kynning á frambjóðendum nokkuð góð, þrátt fyrir allan fjöldann.

Alveg er ég viss um að svona kosning hefði verið nánast óframkvæmanleg ef veraldarvefurinn væri ekki á hverju heimili landsins.

Skyldi hinn almenni kjósandi hafa jafn mikinn áhuga á þessum kosningum og frambjóðendurnir? Ég stórefast um það. Að vísu bendir hin ágæta þátttaka á Þjóðfundinum til mikils áhuga, en hafa ber í huga að þeir sem hann sátu voru á launum og fengu kostnað greiddan.

Einhvern veginn hef ég á tilfinningunni að hinn mikli fjöldi frambjóðenda muni hafa eyðileggjandi áhrif á kosningarnar. Held að fólki fallist hendur við að velja fáeina úr öllum skaranum. Sleppi því bara og sitji heima.

Mín spá er sú að kosningaþátttakan verði mjög dræm. Gamla fólkið lendir í vandræðum með þetta og yngstu kjósendurnir held ég að hafi lítinn áhuga á málefninu.

Ég spái því að kosningaþátttakan verði á milli 30% - 40%.

Hvað heldur þú um það, lesandi góður?

Athugasemdir

[Kolbrún Hilmars, 13.11.2010 kl. 20:21]

Björn, ég spái því að kosningaþátttakan verði á milli 20%-25%.  

[Björn Birgisson, 13.11.2010 kl. 20:34]

Kolbrún, ekki er það nú mikið! Varla meira en atkvæðisbærir fjölskyldumeðlimir og velunnarar frambjóðendanna!

[Kolbrún Hilmars, 13.11.2010 kl. 21:25]

Veit það Björn, það er lítið! En fólk virðist ekki hafa áhuga - nema þá á blogginu og svo velunnarar. Mér var t.d. boðið í jólahlaðborð þann 27. og spurði, hvað - á sjálfan kosningadaginn? Svarið: ha - hvaða kosningadag?