Þar féllu margir góðir menn og konur á blóðvöllinn að ósekju

Ekki laust við að maður sé að verða þokkalega spenntur fyrir kosningunum á laugardaginn. Búinn að raða 23 frambjóðendum á listann minn og er að mestu klár með mitt fólk, sem ég vil að sitji þetta tímamóta þing. Tvö sæti laus. Er með 25 nöfn í þau! Hvernig setti maður aftur fimm fíla í Fólksvagns bjölluna? Er ekki allt hægt?

Þakka góðar ábendingar, sem ég hef fylgt sumum hverjum. Lenti auðvitað í vandræðum með valið, enda gott og frábært fólk í klösum og kippum í framboði og frábært að verða vitni að öllum þessum mikla áhuga. Verst að geta ekki valið 63 úr þessum hópi og sent leikarana við Austurvöll í nokkurra ára launalaust frí í skiptum!

Er búinn að fletta kynningarblaðinu fram og aftur, krossa við þá sem mér leist best á og viti menn: ég var með 80 krossa, þegar allir 522 höfðu verið skoðaðir.

Þá hófst sú erfiða raun að skera 80 menningana mína niður við trog og þar féll margur góður maðurinn og konan á blóðvöllinn að ósekju, en sérhver kvaddur með afsökunarbeiðni, tárum á hvarmi og orðunum: Sjáumst kannski seinna!

Seinna?

Það er nefnilega málið. Ég er algjörlega sannfærður um að mannvalið í þessu framboði til Stjórnlagaþingsins er slíkt, að þó ekki skilaði sér nema brotabrot af því inn á lista flokkanna, eða nýrra framboða, fyrir næstu Alþingiskosningar, þá væri það stórsigur fyrir þjóðina og virðingu Alþingis.

Ég skora á þennan fallega og frambærilega hóp að hafa þessi orð mín í huga þegar fram líða stundir og þjóðin fer að setja sig í kosningastellingar að nýju.

Ég skora einnig á alla Íslendinga að mæta á laugardaginn og taka þátt. Betra að kjósa kannski 1-5 ef fólk er pennalatt. Best þó að kjósa 25, en hafa það þó á hreinu að röðunin skiptir öllu máli. Sá sem fær 1. sætið þitt er að fá miklu meiri stuðning frá þér en sá sem þú setur t.d. í 10. sætið.

Áfram Ísland!

 

Athugasemdir

[hilmar jónsson, 25.11.2010 kl. 22:47]

Hver var aftur í fyrsta hjá þér ?

[Björn Birgisson, 25.11.2010 kl. 22:51]

Hilmar minn, hógvær maður eins og myndi aldrei reyna að hafa áhrif á aðra kjósendur með því að upplýsa um röðunina! Ertu ekki að hressast eftir gusuganginn?

[hilmar jónsson, 25.11.2010 kl. 22:54]

Það gæti nú virkað á ýmsann hátt eftir því hver læsi Björn.

Jú takk, maður sér svona til eftir kvöldið hvort ástæða sé til þess að hætta að fylgjast með framhaldsþáttum..

[Björn Birgisson, 25.11.2010 kl. 23:04]

Hilmar minn, líttu bara á þetta eins og hreinsun. Þú þarft þá ekki að hringja í Jónínu vinkonu þína .......... eins gott, líklega alltaf á tali hjá henni!

[hilmar jónsson, 25.11.2010 kl. 23:11]

Hehe...Segðu Björn..