ESB málið er langstærsti ásteytingarsteinn stjórnmálanna í dag. Af hverju heykjast andstæðingar þess á að ná samstöðu um fall þess?

Í gær ritaði ég eftirfarandi færslu undir fyrirsögninni Minnihlutastjórn VG og Sjálfstæðisflokks. Birti hana hér að nýju með viðbót.

"Með því að skipta um ríkisstjórn er hægt að láta einstök mál hverfa, en þau eru ekki mörg. ESB aðildarumsóknin er eitt þeirra. Vilji er allt sem þarf til. Ætli sá vilji sé til staðar hjá þeim flokkum sem harðast berjast gegn aðildarumsókninni?

Icesave og efnahagsmálin hverfa ekkert. Þau mál þarf að leysa, sama hver stjórnin er.

Atvinnumálin og glíman við atvinnuleysið hverfa ekkert. Þau mál þarf að leysa, sama hver stjórnin er.

Og þannig má lengi telja.

Umsóknin um aðild að ESB er langstærsta deilumálið í stjórnmálunum, en samt sem áður deilumál sem auðvelt er að henda út af borðinu! Ef einhver vilji er til þess.

Sjálfstæðisflokkurinn er á móti aðild. Eða svo segir hann. Vinstri grænir eru á móti aðild. Eða svo segja þeir. Framsókn er lítt hrifin. Eitt eiga þessir flokkar sameiginlegt í sínum málflutningi. Þeir fullyrða að þjóðin vilji ekki inn í ESB. Vilja þeir þá ekki standa með sinni þjóð?

Skoðum það betur. Ef forráðamenn þessara flokka hittast yfir kaffibolla gætu þeir á 10 mínútum ákveðið að draga ESB umsóknina til baka. Ef þeir vilja.

Minnihlutastjórn VG og Sjálfstæðismanna hefði 31 þingmann. Framsókn kæmist í kjörstöðu með því að verja slíka stjórn falli fram að kosningum, sem kannski yrðu að ári liðnu.

ESB málið er langstærsti ásteytingarsteinn stjórnmálanna í dag.

Ef þessir ofannefndu flokkar meina eitthvað með því sem þeir segja, þá er þetta næsta auðveld leið til að losna við, alla vega fresta, hinu umdeilda ESB máli.

Af hverju er þá ekki rokið í málið? Getur ekki VG selt Sjálfstæðismönnum sálu sína rétt eins og Samfylkingunni? Hafa ekki Sjálfstæðismenn bullandi áhuga á stjórnarsetu? Vill ekki Framsókn hafa meiri áhrif?

Meina þessir flokkar kannski minna með því sem þeir segja en þeir vilja viðurkenna?" 

Af hverju liggur ekki Bjarni Benediktsson í Steingrími Sigfússyni með það erindi sem færslan mín fjallar um? Af hverju liggur Steingrímur ekki í Bjarna Benediktssyni með það erindi sem færslan mín fjallar um? Af hverju liggur ekki Sigmundur Davíð Gunnlaugsson í þeim báðum vegna þessa máls?

Við því er bara eitt svar.

Þeir vilja allir í ESB, en þora ekki að viðurkenna það. Hvernig á að túlka þetta öðruvísi? Er eitthvað heilagt við samstarf VG og Samfylkingar? Einhver friðhelgi sem ekki má rjúfa? Held ekki. Öðru nær.

ESB málið er lang, lang stærsta pólitíska deilumálið á Íslandi nú. Afdrifaríkt mál til langrar framtíðar. Eitthvert karp um % hér og % þar í sköttum, niðurskurð hér eða þar á bólgnum og rándýrum kerfum, er ekkert annað en karp um lítilræði, rétt eins og krækiber í helvíti, í samanburði við ESB málið.

Í dag er ESB málið mál málanna. Svo stórt að allt annað bliknar í öllum samanburði.

Ég á frábært eldhús og aðgang að besta kokki landsins og notalegt heimili, ef þessir menn vilja hittast og losna við ESB umsóknina.

Mun ekki bjóða upp á lifur eins og Bryndís, góð sem hún nú er.

Líklegt að kapparnir mæti?

Ríkisstjórnir hafa fallið og verið myndaðar af langt um minna tilefni.