Klámvísur fyrir femínista. Alls ekki fyrir þig!

Kunningi minn var að skamma mig um daginn fyrir efnisvalið á þessari síðu. Taldi hér fátt að finna annað en skrif um stjórnmál og spillingu.

Ég maldaði í móinn og sagði þetta ekki rétt. Hér kæmu stundum gamansögur og brandarar og svona sitt lítið af hverju úr ýmsum áttum. Því var jánkað með semingi, en bætt við að ekkert væri hér um jafnréttismál og feminista og spurt hverju það sætti!

Ég sagðist engan áhuga hafa á femínistum, en lofaði að koma síðar með færslu tileinkaða þeim. Þessi kunningi minn er með stærri brjóst en ég. Kona auðvitað!

Hér er færslan komin og er bönnuð yngri en átján!

Efnið er fengið af síðu hér á blogginu, en ég náði ekki í síðuhöfund til að fá samþykki fyrir birtingunni. Vonandi fyrirgefst mér framhleypnin! Hér kemur nokkuð blautlegur kveðskapur:

 

Vertu brattur vinur minn,

vel ef statt er á þér.

Legðu fatta lókinn þinn

í leiku skrattann á mér.

Baldvin stúrinn varla var,

vildi dúrinn festa þar,

læra klúran lykil bar,

lífs að úri Þorbjargar.

Mín að telja afrek öll

ekki er nokkur vegur.

Ég hef ístru, ég hef böll

ég er guðdómlegur.

Þér við lendar, ljúfa frú,

læt ég endast nótt án trega.

Allvel kenndur er ég nú,

og mér stendur bærilega.

Jón minn hefur litla lyst,

langtum betur aðrir sóttu.

Það var aðeins allra fyrst

að hann réri á hverri nóttu.

Björn á Völlum fer á fjöll,

fram úr öllum rásar.

Lætur sköllótt skuðartröll

skvampa í höllum gásar.

Sýn mér gæði, síður kíf,

svo að fæðist gaman.

Við skulum bæði líf við líf

leggja í næði saman.

Heyrðu góða hjartað mitt,

horfinn er mér dugur.

Get ég ekki gatið hitt -

guð minn almáttugur!

Undir kletti

Ingi fletti

upp um netta

seimagná.

Búkinn fetti

böllinn setti

býsna þétt

í læragjá.

 

Ég elska þig Helga um helgar

og helga þér allt sem mér ber

og því vil ég helga þér Helga

helgasta blettinn á mér.

Athugasemdir

[Adda Laufey , 7.1.2011 kl. 23:32]

hló mikið af visunum =)

[Björn Birgisson, 7.1.2011 kl. 23:43]

Hlóstu? Þetta eru mjög alvarlegar vísur! Takk fyrir innlitið!

[Hulda (IP-tala skráð) 7.1.2011 kl. 23:53]

Það væri áhugavert að vita hvað þú skilur við orðið femínisti sem þú segist engan áhuga hafa á ;)

[Björn Birgisson, 7.1.2011 kl. 23:57]

Því þá Hulda?

[Hulda (IP-tala skráð) 8.1.2011 kl. 00:13]

Mér sýnist þú almennt glöggur og vel skrifandi - það er alltaf áhugavert að heyra skoðanir hugsandi fólks. En þetta er þitt blogg og þú skrifar auðvitað um það sem þú hefur áhuga á - og ég um það sem ég hef áhuga á - og allir sáttir.

[Björn Birgisson, 8.1.2011 kl. 00:48]

Allir sáttir!

[Ómar Geirsson, 8.1.2011 kl. 15:54]

Amen.

Kveðja.

[Björn Birgisson, 8.1.2011 kl. 16:13]

.................. á eftir tvíræðu efninu!

[Kolbrún Stefánsdóttir, 9.1.2011 kl. 00:08]

Þetta er nú ótvírætt efni að mínu áliti  og er þó ekki feministi. Kveðja Kolla.

[Björn Birgisson, 9.1.2011 kl. 00:44]

Takk fyrir innlitið Kolla mín! Þú birtist alltaf eins og sólargeislinn sem blessar fjóshauginn, sem við hin erum föst í!