Hvor árásin er alvarlegri þegar grannt er skoðað?

Ég er ekki verri mannþekkjari en hver annar. Heldur ekki betri mannþekkjari en hver annar. Venjulegur miðlungsmaður. Tel mig þó vera ágætlega til þess fallinn að skilja hismið frá kjarnanum, að mínu mati að sjálfsögðu!

Mér líkar illa þegar aðför er gerð að fólki, jafnvel þótt ekki sé ég algjörlega saklaus í þeim efnum. Taldi mig taka þátt í slíku með sterkum rökum fyrir nokkrum árum. Það er önnur og gömul saga og verður ekki rifjuð upp hér.

Þeir eru margir sem telja Níumenningana hafa sloppið ótrúlega vel frá sinni árás á þjóðþingið okkar. Ég er einn þeirra og ekki hef ég orðið var við neina áfrýjun þeirra sem fengu dóm, sem segir okkur eitthvað um þeirra afstöðu til málsins.

Baldur Hermannsson, bloggari hér á Moggabloggi, sendi þessu fólki tóninn og sagði sína skoðun í stuttum pistli. Fjöldi manns kom með athugasemdir og Baldur svaraði gjarnan í galsakenndum stíl, eins og honum er tamt. Það varð honum dýrkeypt, eins og lesendur vita. Þau orð sem Baldur er að fá bágt fyrir, voru þannig rituð að hverjum manni sem las mátti ljóst vera að ekkert annað en dökkur húmor og galsi lágu að baki. Gott væri að heyra skoðun Vilhjálms Eyþórssonar bloggara, höfundar þeirra orða sem Baldur var að svara, á þeirri skoðun minni. Reyndar einnig allra þeirra sem lásu.

Nú spyr ég:

Hvor árásin er alvarlegri? Árás Níumenninganna á Alþingi Íslendinga eða árás fulltrúa þeirra á Baldur Hermannsson í augljósu hefndarskyni vegna skoðana hans á athæfi þeirra?

Ég legg þessar árásir að jöfnu.

Þær eru báðar stórhættulegar.

Annars vegar er ráðist að Alþingi, lýðræðinu og fulltrúum þess, hins vegar er ráðist gegn málfrelsinu í landinu og æru einstaklings, sem lét óheppileg orð falla í galsa sínum. Algjörlega án nokkurrar meiningar eða merkingar. Það er öllum ljóst sem til þekkja og lásu skrifin á sínum tíma.

Svo eru árásaraðilarnir hylltir í fjölmiðlum, sem velta sér upp úr öllu saman á sínum auðvirðilegu forsendum.

Aumt er það.

Réttlætið í þessu landi er við frostmark.

Ef ekki alkul.

Athugasemdir

[hilmar jónsson, 1.3.2011 kl. 21:35]

Ég tel að mótmæli nímenninganna og alvarleiki þess hafi verið dramatiseraður meira en góðu hófi gegnir. Málsmeðferðin í máli þeirra var líka skandall.

En að stilla Baldri upp líkt og kemur fram í frétt DV, nær ekki nokkuri átt...

[Björn Birgisson, 1.3.2011 kl. 21:38]

Ég bý í fallegri sveit og fæ DV á morgun.

[Jón Óskarsson (IP-tala skráð) 1.3.2011 kl. 22:57]

Það má aldrei skopast að skoðunum sjálfskipaðra handhafa réttlætisins.

[Björn Birgisson, 1.3.2011 kl. 23:23]

Nú, því ekki?

[Baldur Hermannsson, 2.3.2011 kl. 01:23]

Takk fyrir viturlega sýn á hlutina kæru vinir. Engin furða þótt hugurinn leiti suður til Grindavíkur þessa koldimmu örlaganótt, þar lemur hafaldan ströndina, ferskir vindar leika sífellt um mannfólk og híbýli og þar er ekki rými fyrir lítilmennsku og móðursýki.

[Númi (IP-tala skráð) 2.3.2011 kl. 08:12]

Í fyrsta lagi var ekki um neina árás á Alþingi að ræða,og í öðru lagi er ég farin að skilja hversvegna ofurpenninn hann Baldur er svona beittur á pennan,er sú að hann virðist vera illa sofin og ansi úrillur líklegast þegar hann mætir til kennslu,sjáið bara hvenær færsla hans er í´´nótt,, Kl 01:23. Baldur fara snemma að sofa þá verður maður allavega minna úrillur.

[Hulda (IP-tala skráð) 2.3.2011 kl. 13:01]

Hvaða árás? Veit ekki betur en dómstólar hafi blásið þessa meintu árás af í sínum dómi.

Og Baldur Hermannsson er auðvitað svo djúpfyndinn að hann skilja aðeins nokkrir aðrir karlmenn á svipuðu þroskastigi.