Við getum auðvitað kosið, en hver andskotinn á að taka við? Gæfuleysið fellur að síðum stjórnarandstöðuflokkanna.

Hægri menn á Íslandi eru svo uppteknir við að fylgja Jóhönnu og Steingrími eftir með augum og eyrum, að þeir steingleyma að líta í aftursæti sín, að ekki sé nú talað um skottið.

Ástandið innan D og B (dánarbús) flokkanna er að verða nokkuð skrautlegt. Formennskan mun líklega ganga Bjarna úr greipum, enda hann ekki með pungapróf í stjórnmálum. Hann reyndi við pungaprófið í viðskiptum, en féll í munnlegum vafningum.

Við mun taka formaður án pungs, en all nokkra frekju og drjúgan skammt af hroka í farteskinu. Eftir sem áður mun pungsveittur dritstjórinn í Hádegismóum ráða öllum spottum í flokknum.

Slagurinn um varaformennskuna verður líka sögulegur, en enginn innvígður hefur enn leitt að því hugann, til þess skortir bæði framsýni og hugmyndaflug.

Framsókn er að molna innanfrá. Þar svamlar hver áhrifamaðurinn frá borði eftir annan og næsta víst að eftir standi fáeinir fjósamenn, með rekurnar á lofti, að sögn til að moka allan þann skítaflór sem sá flokkur hefur lagt drög að á löngum ferli, en virðist einhvern veginn vera að mestu horfinn, rétt eins og framsóknar gull Samvinnutrygginga og Sambandsins gufaði upp forðum.

Flórinn sá verður aldrei mokaður og verklausir fjósamenn munu styðja sig við rekur sínar eins og unglingar í atvinnubótavinnu bæjarfélaga. Aðeins til að þykjast vera með!

Best væri að loka skottlokinu vandlega og taka stefnuna á Sorpu eða næsta upptökuhæli fyrir vandræðafólk.