Lausn vandamála felst ekki í að gleyma þeim!

Örlítil upprifjun fyrir þá sem hafa kosið að gleyma óþægilegum staðreyndum.
Ísland hrundi í október 2008. Þá strax varð flestum, ef ekki öllum, ljóst að hér yrði áður óþekkt atvinnuleysi, með tilheyrandi landflótta, gjaldþrotum og annarri óáran, hvað sem liði blessunarbeiðni forsætisráðherra í beinni sjónvarpssendingu.
Ríkisstjórn Jóhönnu Sigurðardóttur, hin fyrri, tók við völdum 1.febrúar 2009, eða um þremur og hálfum mánuði eftir hrunið.
Nú á hún allt atvinnuleysið!
Nú á hún allan landflóttann!
Nú á hún öll gjaldþrotin!
Nú á hún líka öll önnur vandamál þjóðarinnar!
Lausn vandamála felst ekki í að gleyma þeim. Heldur ekki í að falsa sögu þeirra.
Öllu heldur er hluti lausnarinnar fólginn í að sniðganga algjörlega gullfiskaminni skoðanafalsara þjóðarinnar.
Það gæti eitthvað hjálpað.

Þá er bara að finna flokkinn sinn!

Mig sárvantar almennilegan stjórnmálaflokk til að styðja. Flokk sem uppfyllir að minnsta kosti 15 af eftirfarandi stefnumiðum:

1. Að vilja einkavæða heilbrigðiskerfið að hluta eða öllu leyti
2. Að vilja einkavæða menntakerfið að hluta eða að öllu leyti.
3. Að vilja hætta allri skattlagningu til tekjujöfnunar í þjóðfélaginu.
4. Að vilja tryggja fáeinum aðgang að helstu auðlindum landsins.
5. Að vilja einkavæða orkulindir og orkusölu í landinu.
6. Að vilja gróða fárra án tillits til aðferðanna sem beitt er.
7. Að vilja forðast heimskulegar þjóðaratkvæðagreiðslur um viðkvæm mál.
8. Að vilja óbreytta Stjórnarskrá um aldur og ævi.
9. Að vilja að allt vatn sem fellur af himnum ofan verði eign landeigenda.
10. Að vilja gjaldmiðil sem kostar íbúðakaupendur 1 milljón á ári í aukaútgjöld.
11. Að vilja einkavæða val á dómurum landsins á báðum stigum.
12. Að vilja afnema aðkomu Ríkisútvarps á fjölmiðlamarkaði.
13. Að vilja ríkisvæða allt tap atvinnulífsins og einkavæða gróðann.
14. Að vilja láta dæma óæskileg kosningaúrslit ógild vegna formgalla.
15. Að vilja tryggja áhrif sín með skipun Seðlabankastjóra.
16. Að vilja óhefta styrki og framlög til flokksstarfseminnar.
17. Að vilja alls ekki ríkisstyrki til starfsemi flokksins.
18. Að vilja aldrei viðurkenna mistök sín.

Þetta er nú allt og sumt. Annað var það nú ekki!

Þá er bara að finna flokkinn sinn!

Ómerkilegar blekkingar

Morgunblaðið er komið í heilagt stríð við Samtök atvinnulífsins og hikar ekki við að beita blekkingum. Segir ályktun SA um að klára ESB viðræðurnar samþykkta með minnihluta atkvæða stjórnar.

Skoðum það. 10 sögðu JÁ. 6 sögðu NEI. 2 sátu hjá.

Held að 3 hafi verið fjarverandi. Það voru því 18 stjórnarmenn sem tóku þátt í atkvæðagreiðslunni á lýðræðislegan hátt.

Hefðu hinir 3 fjarverandi mætt og allir sagt NEI, hefði tillagan samt verið samþykkt með 10 - 9 - 2.

Sannleiksástin er ekkert að kæfa NEI sinna í ESB málinu. Eða hvað?

http://www.sa.is/frettir/almennar/nr/5352/

Snilldar fréttamennska!

Snilldin í fréttamennsku Morgunblaðsins nýtur sín til fulls í þessari frétt!

Nafn þess sem raunverulega tapaði í Hæstarétti í dag er hvergi nefnt í fréttinni!

Hann er sjálfstæðismaður. Fyrrverandi þingmaður og bæjarstjóri í Kópavogi.

Hann heitir Gunnar I. Birgisson.

Fjölskylduvænn maður.

Kannski einum of að mati Hæstaréttar Íslands!

Bæjarfulltrúar sýknaðir í meiðyrðamáli

Sumir borga, aðrir ekki!

Lán og lánleysi.

Sum lán þarf að borga.

Það er algjört lánleysi.

Önnur þarf hreint ekki að borga.

Það er mikið lán!

Þjóðaratkvæðagreiðslur um skuldir og fjármál

Þjóðaratkvæðagreiðslur eru ekki algengar í heiminum. Heldur fátíðar raunar. 2004 áttu umdeild fjölmiðlalög að fara fyrir þjóðina að mati forsetans. Ríkisstjórn Davíðs vildi það ekki og dró lögin til baka.

Icesave fór svo tvisvar fyrir þjóðina, eins og allir þekkja, í bæði skiptin eftir miklar deilur um réttmæti þjóðaratkvæðagreiðslunnar, vegna eðlis málsins.

Nú eru það gjaldþrota Grikkir. Þeir eiga ekkert Icesave, en þeir þurfa ESB save. Flestum fréttum ber saman um að þeir hafi hegðað sér eins og óvitar í fjármálum. Skulda í allar áttir.

Um hvað ætla þeir að spyrja grísku þjóðina? Hvort hún vilji borga skuldir sínar? Varla. Hvort hún vilji evruna áfram? Það er miklu líklegri spurning og svarið gæti verið forvitnilegt fyrir okkur á skammdegisklakanum, sem eigum stórlaskaða krónu og stefnum kannski að sárlasinni evru.

Kannski.

Góð frétt og veltir þungu fargi af þjóðinni!

Fyrirhuguðu verkfalli hljóðfæraleikara Sinfóníuhljómsveitarinnar hefur verið frestað. Samninganefndir Sinfóníuhljómsveitar Íslands og ríkisins skrifuðu undir kjarasamning á áttunda tímanum í kvöld.

Samningafundur stóð yfir hjá Ríkissáttasemjara frá því klukkan níu í morgun en verkfall átti að hefjast á morgun, næðust samningar ekki og Félagsdómur úrskurðaði að boðun verkfallsins væri gild.

Áttu skoðun?

Sumum finnst alltaf allt vera í lagi og allt í raun leyfilegt, innan ramma laganna. Hreinlega vegna þess að þessir sömu sumu bókstaflega þora ekki að hafa aðrar skoðanir en þær sem alltaf fljóta með straumnum.
Dæmi til umhugsunar:
Vilt þú fá 10 flugvélafarma af Rúmenskum sígaunum (Roma fólki) til Íslands, til 90 daga dvalar? Yrði slík heimsókn ekki mikil lyfting fyrir ferðaþjónustuna hérlendis?
Hverju svarar þú?

Blómstrar eða sölnar Liljan?

Lilja Mósesdóttir virðist vera langvinsælasti þingmaðurinn í könnun eftir könnun. Af hverju og hvað hefur hún gert til að verðskulda þessar vinsældir?

Hún hefur talað og lýst skoðunum sínum og hún yfirgaf VG. Hún ber nánast ekki ábyrgð á neinu í athöfnum stjórnarinnar.

Tillögur hennar hafa ekki verið framkvæmdar og því ber hún aðeins ábyrgð á orðum sínum hvað þær varðar.

Nú segist hún vera tilbúin til að leiða nýtt stjórnmálaafl. Hvers konar afl? Hvert ætlar hún að leita?

Hvar ætlar hún að finna fólkið sem á að manna lista Liljuflokksins? Það er flókið mál að stofna stjórnmálaafl.

Mun Lilju takast það og ná fólki inn á þing? Þetta snýst jú allt um það.

Blessuð rjúpan!

Fyrsta rjúpnaveiðihelgin að baki. Einn dagur góður, tveir öllu verri víða um landið. Hef heyrt af mönnum sem náðu þó 50-70 fuglum.

Í sölubanninu í fyrra var gangverð á rjúpu 2500-3000 krónur. Væntanlega verður framboð minna í ár. Færri veiðidagar og minnkaður veiðikvóti (sic)!

Í sölubanninu í ár má því gera ráð fyrir að stykkið kosti 4000-5000 krónur!

Ráðlagður skammtur á veiðimann er 5-6 rjúpur!

Hver nennir að galla sig upp, með vopn og verjur, aka langar leiðir, arka sig auman klukkustundum saman í öllum veðrum, fyrir 5-6 rjúpur?

Nei, þá er nú betra að hafa þær 50-150!

Stofninn?

Hinir veiða bara minna, þá reddast hann alveg!