Pukur og réttindi

"Hjálmar Ragnarsson, rektor Listaháskóla Íslands, vill ekki gefa upp nöfn þeirra sem sóttu um stöðu prófessors í leiklist við skólann. Hann ber fyrir sig trúnaði við umsækjendur. Hjálmar réð nýlega leikarann og leikstjórann Stefán Jónsson í stöðuna.

Eftir því sem DV hefur greint frá mat valnefnd skólans og rektor hans það svo að reynsla Stefáns væri það mikil að hún myndi vega upp á móti þeirri staðreynd að hann hefur hvorki lokið meistaraprófi né doktorsprófi í greininni." segir visir.is

Og ég sem var að vona að svona pukur og nafnleynd tilheyrðu liðinni tíð. Nú er okkur sagt að allt eigi að vera svo gegnsætt.

Það þarf ekki mikið hugmyndaflug til að lesa út úr þessari frétt að í raun skorti Stefán Jónsson ítrustu réttindi til að gegna þessari stöðu, hvað sem líður færni hans og hæfileikum að öðru leyti, sem ég efast reyndar ekkert um. Síður en svo.

Hvaða réttindi höfðu hinir umsækjendurnir sem Hjálmar vill ekki nafngreina?

Hér er önnur frétt:

Togaraútgerð úti á landi hefur ráðið Jón Stefánsson sem skipstjóra á Dallinn OK 123, nýtísku frystitogara. Jón hefur verið háseti hjá útgerðinni lengur en elstu menn muna og hefur því mikla reynslu, en skipsstjórnarréttindi hefur hann engin fyrir svona stórt skip. Þess ber þó að geta að Jón er með pungaprófið. Nokkrir skipstjórar sóttu um stöðuna, en ekki fæst uppgefið hverjir þeir voru.  

Núorðið snýst allt um réttindi.

Kannski full mikið.