Hole in one og svo fugl!

Meistaramót Golfklúbbs Grindavíkur hófst í gær. Aðstæður voru nokkuð erfiðar og var skor keppenda í takt við það. Norðan strekkingur en þurrt og fremur hlýtt. Svipað veður var í dag, öllu meiri vindur ef eitthvað var, kannski um 15 metrar, sem er ekki golflegt veður, en þó boðlegt veður.

Björn Steinar Brynjólfsson, körfuknattleiksmaðurinn knái, sem er með um 24 í forgjöf, stal senunni í gær því hann gerði sér lítið fyrir og fór holu í höggi á 13. braut. Síðan var auðvitað haldið á 14. braut og þar fékk Björn Steinar góðan fugl!

Hann krækti því í 9 punkta á tveimur holum sem hlýtur að vera mjög fátítt.

Þegar þetta er ritað er Björn Steinar enn úti í rokinu og sólinni og því ekki vitað um afrek hans í dag.