Áttu bót fyrir boruna á þér?

Nú þegar gegnsæi á að gilda um alla hluti, nema auðvitað þá sem ekki þola dagsljósið, finnst mér ekki úr vegi að ríða á vaðið fyrir hönd Moggabloggara og gera grein fyrir eignum mínum, sérstaklega ef ég get vakið aðdáun eða öfund einhverra með þeirri afhjúpun!

Mínar eignir eru þessar:

120 fermetra timburhús. Áætlað verðgildi um 25 milljónir. Kannski bara 20 milljónir og fallandi?

Subaru Forester, 2006. Áætlað verðgildi um 2 milljónir, ef sonur minn skilar honum heilum heim í kvöld.

Daewoo Nubira, 2000. Áætlað verðgildi um 200 þúsund. Fínn í golfið og til að flytja rusl!

Combi Camp tjaldvagn, 2000. Áætlað verðgildi  um 450 þúsund. Góðir demparar. Svakalega flott fortjald!

Helmingseign í Ingibjörgu minni, en verðgildi hennar er langt um meira en öll velta Jóns Ásgeirs og allra félaga hans á uppgangstímanum. Ég kann ekki að skrifa svo háar tölur.

Nokkrar innistæður í bönkum, en vegna bankaleyndar má ég ekkert upplýsa um þær fjárhæðir, þótt ég feginn vildi.

Bankaleyndin hefur allan forgang í okkar landi og hana verð ég að virða. Það skilja allir.

Þá er nú flest upptalið, nema kannski innbúið í timburkofanum. Það er tryggt fyrir 10 milljónir, en er bara 5 milljóna virði, en það þarf ekkert að fara lengra.

Ef þú lesandi góður átt bót fyrir boruna á þér, segðu okkur hinum þá hver sú bót er, ef þú þorir!

PS. Ég á líka bensínknúna sláttuvél með Briggs & Stratton mótor, með safnkassa, algjöra dúllu! Þarf ekkert að raka!

Er ekki lífið dásamlegt?

Jón Ásgeir hvað?

Minn eignalisti er alvöru.

Ekki hans.