Það er dýrt að skrifa alltaf sama bullið!

Öllum þeim bloggurum hér á Moggablogginu, sem gjarnan vilja slá tvær flugur í einu höggi, skal hér með bent á að ein leiðin til þess er að skrifa sem oftast rætna pistla um Evrópusambandið og væntanlegar viðræður Íslendinga við báknið.

Hin leiðin til þess er að skrifa sem oftast rætna pistla um ráðherra ríkisstjórnarinnar eða ríkisstjórnina í heild. Föst skot á ýmsa embættismenn eru líka mjög gagnleg.

Hvernig slá menn tvær flugur í einu höggi með því?

Til dæmis með því annars vegar að komast í Staksteina Morgunblaðsins og falla þannig vel að hinni nýju "copy & paste" stefnu ritstjóra blaðsins í því steina (steinaldar) ríki.

Hins vegar með því að spara ritstjóra blaðsins skriftirnar og þurfa endalaust að upphugsa eitthvað nýtt til að skrifa um. Sem reyndar hefur gengið afleitlega, því fátt umfram tvennt ofannefnt hefur hrotið af lyklaborði kappans.

Þegar menn hafa ekki nema 3,8 milljónir á mánuði (2009) er ekkert undarlegt að "copy & paste" stefnan verði fyrir valinu. Hún sparar svo mikla vinnu!

Það er svo rosalega dýrt að skrifa.

Kaupið rétt dugar til þess að kveikja á tölvunni í blæðandi morgunsárinu!

(Endurbirt, aðeins breytt)