Er kosningabandalag rétta leiðin?

Það er augljóst að stjórnmálin hérlendis eru í ógöngum. Hver höndin uppi á móti annarri. Öll samvinna flokkanna og umburðarlyndi þeirra í millum í sögulegu lágmarki.

Ég spurði í könnun hvernig ríkisstjórn menn vildu fá að afloknum næstu kosningum.

Aðeins 17,7% vildu stjórn VG og Samfylkingar, sem teljast verður falleinkunn.

Aðeins 12,9% vildu fá stærstu flokkana, Sjálfstæðisflokk og Samfylkingu saman í stjórn.

Aðeins 20,2% vildu fá Framsókn og Sjálfstæðisflokkinn saman að nýju.

Aðrir valkostir í flokkasamsetningu fengu nánast ekkert fylgi.

Einn valkostur fékk þó ágætan stuðning þátttakenda.

Eitthvað allt annað!

Það krossuðu 34,7% við þann valmöguleika!

Það er greinilega mikið og gott pláss fyrir nýja flokka og ný framboð á Íslandi.

Annað.

Það hugsuðu margir Sjálfstæðisflokknum þegjandi þörfina í síðustu kosningum og sendu hann inn á Alþingi með aðeins 16 þingmenn, sem er sögulegt lágmark. Sá 16. sullaðist inn með morgunkaffinu eftir langa kosninganótt!

Nú mælist sá flokkur með rúmlega 30% fylgi.

Það þýðir að aðrir hafi tæplega 70% fylgi.

Það væri hægur vandinn fyrir þessi 70% að mynda með sér kosningabandalag, ef virkilega er vilji til þess að framlengja skilaboðin sem kjósendur sendu Sjálfstæðisflokknum í síðustu kosningum.

Annað eins hefur nú gerst.

Ekki er þó líklegt að það gerist, en hafa ber í huga að í stjórnmálum er flest mögulegt.