Frétt ársins

Fréttin af þessum dómi Hæstaréttar er langbesta frétt sem skuldugir Íslendingar hafa heyrt frá hruninu mikla. Nú er ljóst að ótaldir milljarðar eiga að rata í hendur hinna skuldugu að nýju.

Þá vaknar stóra spurningin: Hafa þessar lánastofnanir getu til að endurgreiða eða fara þær lóðbeint á hausinn? Gerist það, hvernig á þá að leiðrétta stöðu skuldaranna?

Þessi dómur á aðeins við um bílalánin. Innan tíðar mun væntanlega falla sambærilegur dómur varðandi fasteignalánin. Þar eru allar tölur stærri í sniðum og menn munu taka andköf í bönkunum.

Skuggahliðin á þessum dómi gæti sýnt sig í nýju bankahruni á Íslandi - eða hvað?

Veit einhver hve margir milljarðar eiga samkvæmt dómnum að renna til brosmildra skuldara?

Gengistryggingin dæmd óheimil

Athugasemdir

[Björn Birgisson, 16.6.2010 kl. 18:15]

Landsbankinn áréttar í tilkynningu sem hann sendi frá sér að dómur Hæstaréttar um gengistryggð lán í dag nái eingöngu til þeirra lána en ekki lána sem veitt eru í erlendri mynt.

Bankinn segir áhrif dómsins á rekstur SP-Fjármögnunar óljós.

Tilkynningin hljóðar svo orðrétt:

Samkvæmt dómi Hæstaréttar í dag, 16. júní, eru lán SP-Fjármögnunar, sem er í eigu Landsbankans, talin vera íslensk lán og gengistrygging þeirra dæmd ólögmæt. Dómur Hæstaréttar nær til gengistryggðra lána en ekki lána sem veitt eru í erlendri mynt.

Á þessu stigi er ekki vitað nákvæmlega hversu mikil áhrifin af dóminum verða á eignir SP-Fjármögnunar þar sem ekki er skorið úr um hvernig reikna á lánin. Ákveðin óvissa er því enn til staðar og er mikilvægt að henni verði eytt hið fyrsta.

Vegna óvissu við útreikning á gengistryggðum lánum SP-Fjármögnunar telur Landsbankinn mikilvægt að unnið verði að sátt í samstarfi löggjafar- og framkvæmdavalds og allra hagsmunaaðila.

Landsbankinn telur eftir sem áður að erlend lán bankans séu í samræmi við íslensk lög. Þessi dómur mun hafa áhrif á eiginfjárstöðu SP-fjármögnunar en staða Landsbankans er eftir sem áður sterk.

[Grefillinn Sjálfur - Koma svo! (IP-tala skráð) 16.6.2010 kl. 18:23]

Það er alveg skýrt að þessi dómur á við ÖLL gengistryggð lán sem voru ekki veitt í beinum erlendum gjaldmiðli, þ.e. þar sem lántakandi fékk lánið EKKI greitt út í erlendri mynt. Þannig að við skulum ekki taka of mikið mark á yfirlýsingu Landsbankans fyrr en öll kurl eru komin til grafar.

[Björn Birgisson, 16.6.2010 kl. 18:27]

Grefill, verður þetta ekki bara svona: Bankahrun - Taka 2.

[Gunnar Björn Björnsson (IP-tala skráð) 17.6.2010 kl. 00:07]

Mér fannst alltaf hálf furðulegt að Árni Páll væri að koma með frumvarp um bílalán í stað þess að bíða eftir niðurstöðu þessa dóms.