Hækkun fasteignaskatta framundan

"Heildarfasteignamat á höfuðborgarsvæðinu lækkar um 10,4%, á Suðurnesjum um 7,4%, á Vesturlandi um 6,4%, á Vestfjörðum um 1,2%, á Norðurlandi vestra um 0,7%, á Norðurlandi eystra um 4,4%, á Austurlandi um 0,8% og á Suðurlandi um 3,4%."

Þetta nýja fasteignamat breytir miklu fyrir sveitarfélögin. Fasteignaskatturinn er um 20% af tekjum þeirra. Það er nánast pottþétt að þau mæta þessari lækkun matsins með hækkun fasteignaskatta, flestum íbúum sínum til aukinnar armæðu, sem er þó ærin fyrir.

Það mun ekkert velkjast fyrir pólitískt blönduðum sveitarstjórnum að hækka fasteignaskattana.

Hins vegar verður fróðlegt að sjá framan í fulltrúa Sjálfstæðisflokksins, þar sem þeir hafa hreinan meirihluta, þegar þeir tilkynna sínu fólki um hækkanirnar, en ég spái því að það muni þeir gera.

Það er nefnilega þannig að flokkurinn sá mótmælir hástöfum öllum sköttum, nema þeim sem fulltrúar hans leggja á fólkið. Sem er all nokkuð skondið. Raunar bráðfyndið.

Einhvern veginn eru þeirra skattar betri og réttlátari skattar.

Nú bíð ég spenntur viðbragða úr Garðabæ, frá Seltjarnarnesi og ekki hvað síst úr Reykjanesbæ.

PS. Hefur nokkur maður séð stafkrók frá hægri mönnum á Íslandi þar sem hneykslast er á stórauknum sköttum nýju íhaldsstjórnarinnar í Bretlandi? Kannski tróðu bara frjálsir demókratar þeim sköttum í gegn.

Auðvitað, hvernig læt ég!