Eru nú afturgöngur græðgisvæðingarinnar 2007 að fylkja liði til stórsóknar?

Fyrrverandi starfsmenn hins fallna Landsbanka eru að vakna til lífsins og sjá að minna er í buddunni en góðu hófi gegnir fyrir snilldina alla sem þeir lögðu til og unnu að í bankanum skítfallna, sem kenndi sig við landið allt og gott ef ekki miðin líka.

Starfsmennirnir fyrrverandi heita Ívar Guðjónsson, Árni Emilsson, Árni Kristjánsson, Steinþór Gunnarsson, Bjarni Þórður Bjarnason, Guðmundur Ingi Hauksson, Kjartan Guðmundsson, Sveinn Garðar Helgason, Helgi Þór Arason og Hafþór Hafliðason, segir mbl.is í dag.

Mig grunar að allir þessir kappar hafi fengið útborgað reglulega mánaðarlega, það er sín föstu laun og líklega ekki í lægri kantinum, svona miðað við launafólk almennt í þessu ágæta landi.

Mig grunar jafnframt að nú séu þeir að leita eftir umsömdum bónusum, vegna frábærs árangurs sem varð af störfum þeirra og beiti nú Sigurði G. Guðjónssyni lögmanni fyrir þann vagn, en fullyrði svo sem ekkert í þeim efnum. Eitt er nú grunur og annað fullvissa!

Skyldu nú allar afturgöngur græðgisvæðingarinnar 2007 vera komnar á kreik, eða höfum við aðeins fengið forsmekkinn af þeim draugagangi?

Ráðlegg öllum að sofa með litla ljóstýru á náttborðinu á næstunni.

Athugasemdir

[Sigurður Haraldsson, 28.9.2010 kl. 00:11]

Sef alltaf við ljós.

[Björn Birgisson, 28.9.2010 kl. 00:35]

Ekki veitir af!

[Sigurður Sigurðsson, 28.9.2010 kl. 00:39]

Ég er ekki viss um að ljóstýra dugi þegar svona lið fer á stjá. 2000 watta kastari væri nær lagi.

[Björn Birgisson, 28.9.2010 kl. 00:41]

Sigurður Sigurðsson, ertu hræddur við drauga? 2000 wött gefa svolítið glannalega birtu!

[Sigurður Sigurðsson, 28.9.2010 kl. 01:19]

Bankadraugar eru sýnu verri en aðrir draugar. Pínu skelkaður.