Gylfi Þ. Gíslason (1917 - 2004). Minningu góðs manns sýndur sómi.

"Brjóstmynd af Gylfa Þ. Gíslasyni, fyrrverandi formanni Alþýðuflokksins, ráðherra og prófessor, var afhjúpuð við athöfn í hátíðarsal Háskóla Íslands í dag. Brjóstmyndina gerði Erlingur Jónsson myndhöggvari."

Maður fyllist söknuði og trega við lestur þessarar fréttar. Gylfi Þ. Gíslason var afburðamaður, gríðarlega vel liðinn, jafnt af samherjum sem andstæðingum í pólitíkinni.

Hann var virtur fræðimaður, fágaður í allri framkomu, skoðanafastur, en þó umburðarlyndur gagnvart annarra skoðunum.

Kynslóðin sem Gylfi tilheyrði er að mestu horfin á vit forfeðra sinna. Faðir minn, sem lést í sumar, var jafnaldri Gylfa, og náinn samstarfsmaður hans til margra ára og þess vegna gafst mér, sem kornungum manni, kostur á að hitta Gylfa nokkrum sinnum. Ég skynjaði strax að þar fór heillandi maður sem hafði ótrúlega góða nærveru.

Þjóðinni til heilla vildi ég að margir menn eins og Gylfi og ýmsir gengnir öðlingar úr öðrum flokkum, væru nú í forustuliði þjóðarinnar.

Því er ekki að heilsa.

Því miður.

Minningunni um þennan góða dreng verður að halda á lofti.

Athöfnin í dag var gott framtak í þá veru. 

 

 

Brjóstmynd af Gylfa afhjúpuð

Athugasemdir

[Ómar Geirsson, 28.12.2010 kl. 12:49]

Mikið er ég sammála þér Björn.

Ég náði að sitja í tímum hjá Gylfa, rétt áður en hann hætti.

Gamall í árum, ungur í anda, þvílíkur kraftur og reisn sem geislaði út frá manninum.

Gylfi var stórmenni í öllu tilliti.

Kveðja að austan.

[Björn Birgisson, 28.12.2010 kl. 19:15]

Ómar minn, síðbúnar þakkir fyrir innlitið!