Kærur vegna kosninganna vandlega undirbúnar með hátæknibúnaði

Nú er undirbúningurinn að kærum vegna kosninganna á laugardaginn kominn vel á veg samkvæmt áreiðanlegum heimildum BB Frétta, sem eins og fyrri daginn vilja ekki láta nafna sinna getið. Bæði liðin eru að verða klár með sitt.

Sending af örmyndavélum mun hafa komið til landsins með flugi í gær í tveimur kössum. Annar fyrir JÁ liðið. Hinn fyrir NEI liðið.

Skemmtileg tilviljun að kassarnir komu með sömu flugvélinni, frá London, en samkvæmt heimildum BB Frétta í Leifsstöð mun annar hafa verið með enskum áletrunum, en hinn með einhverju óskiljanlegu rússnesku hrafnasparki, sem enginn hlaðmannanna skildi, en gegnumlýsing kassanna mun hafa sannfært starfsmennina um innihald þeirra.

Þrátt fyrir ítarlega eftirgrennslan hefur BB Fréttum ekki tekist að komast að því hvar örmyndavélarnar verða settar upp, en miðillinn hvetur kjósendur til að líta afar vel í kringum sig í kjörklefanum á laugardaginn. Hvar sem er á landinu.

Einn heimildamanna BB Frétta hefur staðfest að fjórir erlendir sérfræðingar séu komnir til landsins til aðstoðar við uppsetningu búnaðarins og munu þrír þeirra vera breskir, en ekki er vitað um þjóðerni þess fjórða. Hann mun ekki hafa verið á tréklossum, en verið með einhverja bæklinga á sér frá AGS að sögn tollvarða.

Ef árvökulir kjósendur reka ekki augun í tækin í tæka tíð er fullvíst að kosningin verður kærð til Hæstaréttar.

Hvernig sem fer.

Mundu að hafa augun opin á laugardaginn í kjörklefanum!

Kannski verður þú í mynd og atkvæðið þitt líka!

Athugasemdir

[Sigurður I B Guðmundsson, 6.4.2011 kl. 19:02]

Ef BB Fréttir vantar starfsmann í Reykjavík láttu mig þá vita. Bý rétt hjá "sérstökum" og get þess vegna komið með nýjar fréttir þaðan með mjög stuttum fyrirvara ef ég fæ góðan kíki.

[Björn Birgisson, 6.4.2011 kl. 19:18]

Ráðinn. Sendi þér kíki og öflugan hljóðnema. Þú byrjar á að ráða þig sem gluggaþvottamann hjá Sérstökum!